مما قرأت -- الفرافير

زوجة السيد: هو فيه أهم م الأكل؟! أهم من إننا نعيش.

فرفور: أيوه.. أهم من إننا نعيش نعرف عايشين ليه، وأهم من ليه إننا نعرف حانعيشها إزاي؟

زوجة السيد: زي الناس ما هي عايشاها

فرفور: وانتي عارفة الناس عايشاها إزاي؟

زوجة السيد: زي ما طول عمرهم عايشنها.

فرفور: وعارفه طول عمرهم عايشين إزاي؟ فوق بعض.. بالطول كده.. كل واحد شايل التاني.. كل سيد فوقه سيد وكل فرفور تحته فرفور.. جوزك السيد ده واللا سيدك الجوز فوق سيد، يعني فرفور زيي تمام، وأنا تحتي فرفور، يعني أنا راخر.. تصدقي ما تصدقيش سيد.. إحنا 3600 مليون بني آدم عاملين عامود بالطول كده كل واحد شايل واحد، وكل واحد عايز يوقع اللي شايله ويفضل متسمر فوق اللي تحتيه، وحياة خالتي نبوية إحنا من يوم ما بقينا شعوب وقبائل وإحنا كده.

زوجة فرفور: وكده ماله، ماله كده؟ عيبه إيه يابو لسان متبري منه؟

فرفور: عيبه يا ولية إننا مفعوصين وتعبانين وزعلانين ومش عارفين ليه.. عيبه أن الواحد منا حاسس انه مش عايش في الدنيا، إنما عايش وشايل الدنيا كلها فوق اكتافه.. عيبه اننا مزمزقين، من أيام حواء وآدم واحنا مزمزقين، اللي متشال عايز يخنق اللي شايله، واللي شايل عايز يقرقش المتشال.. عيبه انه منظر يضحك لو فيه مرايه نبص فيها كنا سخسخنا على روحنا من الضحك إنما فين المراية اللي توري الناس روحهم، فين المراية اللي تورينا احنا الأربعة يدوبك وضعنا الحقيقي، عارفين احنا في الحقيقة إزاي؟ احنا عامود، حضرتك يا ست راكبة فوق السيد والسيد راكب فوقي واحنا كلنا راكبين فوق الكركوبة دي، ولا هي شايفة ولا إحنا شايفين إنما مضايقين، كفرانين.. فيه جنس في الدنيا عايش كده إلا جنس آدم.. كل سيد عايز يبقى سيد حتته.. سيد بلده.. سيد وطنه.. سيد عامله.. سيد التاريخ... تاريخنا نفسه برضه راكب فوق بعضه، دولنا، حضارتنا، كل دولة عايزة تبقى الست على الدول، وكل حضارة عايزة تبقى ست الحضارات. والنتيجة خناقات بنبابيت تعلى تبقى ببنادق تعلى تبقى بجيوش وقنابل، ويقع من الطابور عشرة عشرين وتلاتين مليون، ومن تاني يوم تبدي الخناقات من جديد، ونسميها أسامي تضحك، قال انهيار الحضارة اليونانية، وقيام الحضارة الرومانية، قال ايه الحرب الباردة بين الشرق والغرب، قال ايه الصراع بين روسيا والصين وفرنسا وأمريكا وكله كله فرفور وسيد، مين يبقى سيد ومين يبقى فرفور، وانا فرفور ليه وانت سيد ليه؟. من يومنا واحنا كده.. وفاهمين ان الدنيا كده والناس كده ما نعرفشي إلا كده، إنما بذمتكو دي عيشة دي، دي طريقة.. وحياة خالتي نبوية انا متأكد إننا قابلينها لسبب واحد مفيش غيره.. إننا مش شايفينها، ولو شفناها، لا يمكن نقبلها.. وأصل الحق مش علينا، الحق على اللي بيشوفولنا، الفلاسفة بتوعنا والمفكرين، اللي التفكير عندهم لازم يكون تفكير في التفكير والتفكير الحقيقي هو اللي يفكر في اللي بيفكر في اللي بيفكر انه يفكر، انما أهه آدي مشكلة حياتنا كلها أهه، حدش يجدعن ويفكر لها في حل؟

زوجة السيد: إيه السرحان ده يا فرفور، انت عايز تعيد تنظيم الكون؟ تبقى أجننت..

فرفور: عندك حق، اللي يحاول ينظم الكون الملخبط يبقى هو المجنون، واللي يسيبه على لخبطته يبقى هو العاقل..

زوجة سيد: احنا ملنا ومال الكون؟.. ما تخلينا هنا..

فرفور: ما إحنا هنا والله هنا، في كل مكان في الدنيا، وهنا وفي كل لحظة، دلوقتي، الخناقة شغالة مستمرة عمرها ما وقفت ثانية، عندنا هنا وبرة، إسمعي.. دي مش صفارة أتوبيس، أهو دلوقتي زمان الكمسري بيقول للسواق متبقاش تتطلع إلا لما أصفر لك، والسواق بيقوله أنا مش فرفور عندك، انا باخد ماهية أكتر منك، ما فيش من نظام يرصنا جنب بعض بالعرض كده، ما فيش؟!

زوجة فرفور: الأكاده عليك لماضة إنما تقول مهما تقول الولاد بطونها بتصرخ م الجوع، أديهم إيه يأكلوه.. كلام؟ أنا دايجة من قلة المعاملة، وأنت هفتان من قلة الغدا حاتعالج ده بإيه يا فيلسوف؟

زوجة السيد: أنا عمري ما شفت حد في الدنيا يعمل كده.. حد يسيب شغله يسيب نفسه يسيب عيلته، ويقعد كده ما يتحركش إلا لما يلاقى لحكاية سيد و فرفور دي حل؟؟ طيب وإذا ملقيتش الحل وإذا طال؟..

زوجة فرفور: وإذا حزن وإذا أتهبب على عينه و ما جاش، تعمل إيه؟..

زوجة السيد: نموت ونتحنط حنبكم؟

 زوجة فرفور: نمد إيدنا ونشحت؟

زوجة السيد، زوجة فرفور: تلاقوه ما تلاقوهوش عنكم ما لقيتوه، إنما لازم إحنا نفضل عايشين.

زوجة السيد: فكروا زي ما أنتم عايزين، بس أشتغلوا وأكلونا.

زوجة فرفور: وكلوا أنتم كمان.

زوجة السيد: عيشونا وعيشوا الأول وبعدين فكروا زي ما أنتم عايزين..

زوجة فرفور: انجز قدامي على الشغل يا خويا يا بتاع سيد و فرفور.

زوجة السيد: وانت كمان يا جوجو، الدنيا كلها بتتحرك ما فيش واقف إلا أنتو، ياللا اتحركوا معاها لتموتوا.. والحياة لازم تستمر يا حبيبي.

السيد: إيه رأيك يا فرفور في الكلام ده؟

فرفور: رأيي؟! ما هو اللي ودانا في داهية حكاية الحياة لازم تستمر دي.. لازم الجاموسة تفضل دايرة في الساقية، وعلشان تدور لازم يغموها، وأكل العيش يا سيد هو الغما بتاعنا.. طول ما هو ورانا لا حنشوف نفسينا ولا حنعرف إحنا بنلف ليه عندهم. حق الحياة لازم تستمر.. الفع حملك وشي يا بهيم.. انغمي ودور.. لأن الحياة لازم تستمر!

*من مسرحية الفرافير لسيوف إدريس