نظرية البغل

ما هو أكيد مفيش نظرية ف العالم هيبقى أسمها نظرية "نظرية البغل"! D:

أسمها الحقيقي "النظرية العرقية" أو "Racial Theory" وهي بتقول (بما معناه): التهجين ينتج عنه الانحدار (Hybridity results in degeneration)

يعني مثلاً: لما حمار يتجوز حصانة هيخلفوا بغل.. البغل ده كائن غير قادر على التكاثر، يعني كأنه كائن ميت!

ده معناه إننا لما نجيب حروف إنجليزي عشان نكتب بيها كلام عربي يبقى إحنا اخترعنا لغة "منحدرة" أو بمعنى أخر لغة ميتة. وبالتالي لما تكتب أفكارك وآرائك ومشاعرك بلغة الفرانكو فكتابتك دي مش هتفضل لأنك استخدمت لغة ميتة أساساً.

وبعدين تخيل معايا جيل كامل طالع مش بيستخدم غير الفرانكو في تقريباً كل حاجة ف حياته لدرجة إنه لما يحاول يكتب بالعربي بيحس إنه صعب أوي، تفتكر جيل زي ده هيطلع منه العقاد ولا أحمد شوقي ولا حتى علي سلامه؟ ده أصلاً الناس من كتر م أتعودت ع الفرنكو بقيت بتكسل تقرا عربي.. مش بس تكتبه!

وياريت محدش يقولي إنه لما بيحب يعبر عن نفسه بيكتب بالإنجليزي، لأن أولاً مش كل الناس هتفهمك، وثانياً بقى حضرتك مهما وصلت درجة إتقانك لأي لغة تانية فعمرك م هتوصل لدرجة المتكلم الأصلي للغة دي، وهيتبصلك دايماً على إنك "درجة تانية"، وأبسط دليل على كده إن الناس اللي لغتهم الأصلية مش إنجليزي وبيكتبوا أدب بالإنجليزي بتتسمى كتابتهم "Literature in English" مش "English literature"، يعني كأنهم لا يرقوا إن تكون كتابتهم دي ضمن الأدب الإنجليزي!

الغريب بقى إني لما قررت أكتب بالعربي لقيت ناس بتقولي “2nty btkby bel 3rby leeh”! يعني الناس بتستغرب لما العربي يتكتب بحروف عربي ومش بتستغرب لما يتكتب بحروف إنجليزي!

فاكر قوم سيدنا لوط لما قالوا "أَخْرِجُوا آلَ لُوطٍ مِّن قَرْيَتِكُمْ إِنَّهُمْ أُنَاسٌ يَتَطَهَّرُونَ"! يعني هم عايزين يخرجوا سيدنا لوط وأهله عشان على حق وهم على باطل! أصل خلي بالك.. طبيعة الإنسان إنه لما بيشوف حاجة مش صح كتير قدامه بتتحول مع الوقت لحاجة "عادية" وبيبقى الصح هو اللي غريب!

طيب بعد الرغي الكتير ده، أنا كل اللي بطلبه من حضرتك إنك تكتب بالعربي على الأقل ف الأماكن اللي ناس كتير هتشوف كلامك فيه، عشان الناس ترجع تتعود تاني إنها تشوف العربي ف كل مكان (مش بس ف الكتب) ويبقى الفرانكو هو اللي غريب..

وعلي رأي مروة مرجان.. "كلمني عربي وحياة أبوك!"

*الصورة من غلاف كتاب ماذا حدث للمصرين ل د. جلال أمين