- لا مؤاخذة أصلي مستني البرنس.
- برنس مين؟!
- اللي هيحل كل المشاكل اللي بتحصل ف البلد دي.
- وهو هيحل كل المشاكل دي إزاي؟!
- هو كده، أصل المشاكل اللي زي دي بيبقي حلها إن يجي واحد برنس كده يخلص.. يجيب م الأخر.
- ماهو أكيد الناس اللي ولعت في نفسها دي كانوا زيك كده برده مستنين البرنس، بس واضح إنهم فقدوا الأمل وزهقوا من كتر م أستنوا فقرروا يخلصوا همَّ ويجيبوا م الأخر وولعوا ف نفسهم، ولو الشعب المصري كله فضل يستنى البرنس كده كتير يبقى البلد كلها حتولع!
أصل اللي أنت مش واخد بالك منه أن البرنس ده مش بيطلع من فراغ، ده واحد زيّ وزيك وزي اللي ولعوا في نفسهم دول، بس الفرق الوحيد إنه لما زهق من وصول البرنس المنتظر –بدل م يولع ف نفسه- قرر يبقى هو البرنس ده..
وعملاً بمبدأ "فاقد الشئ لا يعطيه"، ف البرنس ده قرر إنه يبقى عادل عشان يحل مشكلة الظلم، ويبقى أمين عشان يحل مشكلة الغش، ويبقى متسامح عشان يحل مشكلة التعصب، ويبقى شريف عشان يحل مشكلة الرشاوي، ويبقى نشيط عشان يحل مشكلة البطالة، ويبقى مثقف عشان يحل مشكلة التخلف، ويبقى نطيف عشان يحل مشكلة التلوث، ويبقى محترم عشان يحل مشكلة قلة الأدب، ويبقى كريم عشان يحل مشكلة الفقر، ويبقى.. إلخ.
صحيح هو عارف إنه ممكن ميبقاش أحسن برنس ف التاريخ وممكن ميعرفش يحل كل المشاكل، بس لو كلنا قررنا نبقى البرنس المنتظر ده ممكن ف يوم الدنيا تمطر وتطفي مصر اللي بتولع دي..
*فكرة هذا المقال مستوحاة من إيناس البداوي
:) بوست رائع مع خالص تحياتى
ReplyDeleteالبرنس
شكراً =)
ReplyDeleteأنا نفسي بس الناس اللي مستانية البرادعي -أو أي حد تاني يجي عشان يغير- تفهم إنه عمره م هيغير حاجة لو إحنا فضلنا كده
عشان ييساطة ربنا سبحانه وتعالى قال "أن الله لا يغير ما بقوماً حتى يغيروا ما بأنفسهم"