دايماً بعتبر نفسي شخصية غريبة، ساعات بتعلم حاجات من ناس حواليا ومش شرط يكونو قريبين منّي، بالعكس ممكن يكون حد متكلمتش معاه غير مرتين بس أتعلمت منه حاجه متعلمتهاش من ناس أعرفهم بقالي سنين، وده مبيدلش بإي حال من الأحوال إن مش الحد ده أحسن من الناس دي. ممكن حد يقول كلمة قدامي أو يعمل تصرف معين يغير في شخصيتي من غير حتي ميكون واخد باله..
من كام يوم كنت بتكلم مع بنت قلتلي كلمة علقت معايا أوي، "لو متعرفينيش يبقي متحكميش عليّه" ( أو حاجه زي كده D: )، ورغم إني ممكن أكون سمعت الكلمة دي أو كلام زيها قبل كده كتير، بس ربنا أراض إن المره دي بالذات هي اللي الكلام يعلق فيها معايا.
لما روحت فضلت أفكر في الناس اللي حكمت عليهم من غير معرفهم بجد، أو الناس اللي علاقتي بيهم علاقة "سطحية" وحكمت عليهم من أول إنطباع أخدته عنهم أو حتي من كلام الناس عنهم. يااااه!!!!! أنا في كذا حد عملت معاه كده! أنا إزاي بعمل كده؟! طيب هو معني كده إني ظلمت الناس دي؟! أكيد ظلمتهم.. طيب هم ممكن يسمحوني؟ لو أنا كنت مكنهم كنت حسامحهم؟ مش عارفه...
أعتقد إن الحل إني أبدأ بنفسي وأبطل أحكم علي أي حد مهما كان، أولاً لأني مش في مكانة تسمحلي إني أحكم علي أي حد، ثانياً أنا بني أدمة زيّ زيهم وزي مهما ممكن يكونو بيغلطو أنا كمان بغلط، علي الأقل أنا مش متأكدة من غلطاتهم بس متأكدة من اللي أنا بعمله، مما يعني إنهم أحسن منّي.
أنا ححاول أشوف الحاجة الحلوه في الناس ومديش لنفسي الحق إني أحكم علي أي حد، وأكيد لو عملت كده حبقى مبسوطة أكتر وأنا بتعامل مع الناس كلها
أنا حبدأ بنفسي... =)
(ملحوظة: الكلام ده أنا كنت كتباه لنفسي، فأنا بأعتذر لو في أخطاء في اللغة أو لو الأسلوب ركيك :))
(ملحوظة: الكلام ده أنا كنت كتباه لنفسي، فأنا بأعتذر لو في أخطاء في اللغة أو لو الأسلوب ركيك :))
انا معاكي جدا
ReplyDelete:)
بجد
و بشكل عام .. الانطباع الاول مايعتبرش حاجة يعني عشان تقدري تحكمي بهيا على حد
و اكيد فيه ظلم :)
صريح اوي البوست دة
بسيط و مش منمق :)
شيماء! جزاكي الله خيراً
ReplyDeleteأنا بجد بفرح لما بشوف تعليقاتك :)
لا فُض فوك
ReplyDeleteهذا عين العقل